झापा । पूर्णिमा राईको ह्याट्रिकसँगै साबिक उपविजेता नेपालले साफ यु-२० महिला च्याम्पियनसिप सानादर सुरुआत गरेको छ।
बंगलादेशको राजधानी ढाकास्थित बसुन्धारा किङ्स एरेनामा शुक्रबार सम्पन्न पहिलो खेलमा नेपालले प्रतियोगिताकै कमजोर टोली भुटानमाथि ६-१ को फराकिलो जित हात पारेको हो। योसँगै नेपालले ३ अंक जोडेको छ।
नेपालका लागि पूर्णिमाबाहेक सेनु परियारले २ गोल गरिन्। भूटानकी केल्देन वाङ्गमोले सान्त्वना गोल फर्काइन्। खेलको नवौं मिनेटमै नेपालले सेनुको गोलमार्फत सुरुआती अग्रता लिएको थियो। नेपालले पहिलो हाफमा ३-० को अग्रता लिएको थियो।