शनिश्चरे । झापाको अर्जुनधारा नगरपालिकाले आर्थिक वर्ष २०८३र०८४ का लागि कुल ८९ करोड ८५ लाख २५ हजार बराबरको वार्षिक बजेट, नीति तथा कार्यक्रम सार्वजनिक गरेको छ । नगरपालिकाको १९औँ नगरसभाका अवसरमा बुधबार उपप्रमुख खड्गमाया पराजुलीले बजेट तथा कार्यक्रम प्रस्तुत गरेकी हुन् ।
उनले आगामी वर्षको नीति तथा कार्यक्रम प्रस्तुत गर्दै कृषि, पूर्वाधार, शिक्षा, स्वास्थ्य, सुशासन र सामाजिक विकासलाई प्राथमिकतामा राखेको जानकारी दिइन् ।
नगरपालिकाले आगामी वर्ष कृषि तथा पशुपन्छी विकासका लागि एक करोड ११ लाख, सामाजिक विकासतर्फ ५ करोड २५ लाख, वन, वातावरण तथा विपद् व्यवस्थापनका लागि १ करोड ४४ लाख, संस्थागत विकास तथा सुशासनका लागि १ करोड २९ लाख तथा पूर्वाधार विकासका लागि १० करोड ६८ लाख बजेट विनियोजन गरेको छ ।
नगरले नीति तथा कार्यक्रममा स्थानीय कृषि उत्पादन प्रवद्र्धन, रैथाने बाली संरक्षण, भूमिहीन तथा सुकुम्बासी व्यवस्थापन, डिजिटल सुशासन, गुणस्तरीय शिक्षा, स्वास्थ्य सेवाको विस्तार, ज्येष्ठ नागरिकमैत्री कार्यक्रम तथा महिला, बालबालिका र विपन्न समुदायको सशक्तीकरणलाई विशेष प्राथमिकता दिएको छ ।
नगरपालिकाले चालु आर्थिक वर्षमा सडक कालोपत्रे, पशु अस्पताल निर्माण, डिजिटल नगर प्रोफाइल निर्माण, खेलकुद पूर्वाधार विकास तथा कृषि र स्वास्थ्य क्षेत्रमा उल्लेखनीय उपलब्धि हासिल गरेको जनाएको छ ।
साथै, सीमित स्रोत–साधन, राजस्व संकलन, अव्यवस्थित बसोबास, वातावरणीय चुनौती तथा पूर्वाधार निर्माणमा देखिएका समस्यालगायतलार्ई आगामी वर्षका प्रमुख चुनौतीका रूपमा औंल्याएको छ ।
नगर प्रमुख बलदेवसिंह गोम्देन तामाङको अध्यक्षतामा भएको सभामा सचिव अनोजकुमार घिमिरे, वडाध्यक्षहरुसहित नगरपालिकाका जनप्रतिनिधि, कर्मचारीहरुलगायतको उपस्थिति रहेको थियो ।