एकतप्पा, इलाम । इलामको फाकफोकथुम ७ स्थित सिकारी भञ्ज्याङमा जारी चौथो एकतप्पा गोल्डकप पुरुष तथा महिला फुटबल प्रतियोगितामा कोलबोटे र पोखरीले विजयी सुरुवात गरेका छन् ।
स्थानीय सिंहदेवी माविको खेलमैदानमा आयोजित महिलातर्फको दोस्रो क्वाटरफाइनल खेलमा स्थानीय कोलबोटे एफसीले लोख्रुम्बा एफसी इलामलाई सडनडेथमा ६-५ गोलअन्तरले पराजित गर्दै सेमिफाइनलमा स्थान बनाएको हो । कोलबोटेकी गोलरक्षक सन्दिला राई प्लेयर अफ दी म्याच बनिन् । उनले नगद १ हजार पाइन् ।
यसैगरी, पुरुषतर्फ पोखरी युथ एफसीले एकतप्पा एफसीलाई ३-० गोलअन्तरले पराजित गर्दै सेमिफाइनलमा प्रवेश गरेको छ । पोखरी युथका लागि दिपेश श्रेष्ठले २ गोल गरे भने श्याम मुर्मूले एक गोल गरेका हुन् । श्याम मुर्मू प्लेयर अफ दी म्याच बन्दै नगद १ हजार पाउन सफल भए ।
बिहीबार पुरुषतर्फ डिफेन्डिङ च्याम्पियन फाल्गुनन्द एफसी र हाङमाचुली एफसीबीच तेस्रो क्वाटरफाइनल खेल हुनेछ भने महिलतर्फ सीएसएस एफसी बी र मैदाने एफसीबीच खेल हुनेछ ।
दीपावलीको अवसरमा क्रिएटिभ सोसियल स्पोर्टिङ क्लब फाकफोकथुम ७ ले आयोजना गरेको प्रतियोगिताको कात्तिक १६ गते हुने पुरुषतर्फको फाइनल खेलको विजेताले नगद १ लाख ५० हजार र उपविजेताले ७५ हजार पाउने छ ।
यसैगरी, महिलातर्फको विजेताले नगद ५० हजार र उपविजेताले २५ हजारसहित ट्रफी पाउने आयोजकका अध्यक्ष पदम योङहाङले जानकारी दिए ।