बिर्तामोड । प्रदेश सरकारका सामाजिक विकास मन्त्री जीवन घिमिरेले कोरोना भाइरसको ‘हटस्पट’ बनेको झापाको कचनकवल गाउँपालिकाको आज अनुगमन गरेका छन् ।
प्रदेशसभा सदस्य बसन्त बानियाँलाई साथमा दिएर मन्त्री घिमिरे अनुगमनमा गएका हुन् । उनले स्थानीयबासीलाई कोरोना संक्रमणको जोखिमबाट नआत्तिन आग्रह गरेका छन् ।
मन्त्री घिमिरेले कचनकवलका विभिन्न क्वारेन्टाइनको अनुगमन गर्दै कोरोना भाइरसको नियन्त्रण र संक्रमितको उपचारमा प्रदेश सरकारले कुनै कन्जुस्याईँ नगर्ने बताए ।
मन्त्री घिमिरेका साथमा झापाका प्रमुख जिल्ला अधिकारी उदयबहादुर राना, प्रहरी प्रमुख एसपी कृष्णप्रसाद कोइराला र भद्रपुर नगरपालिकाका प्रमुख जीवनकुमार श्रेष्ठ पनि कचनकवल पुगे ।
मन्त्री घिमिरे सहितको टोलीलाई स्वागत गर्दै कचनकवल गाउँपालिकाका प्रमुख अञ्जरा आलमले कोरोना नियन्त्रणका लागि गाउँपालिकाले गरेको कामका विषयमा अवगत गराएका छन् ।
भारतबाट आएका १२७ जनामा एकपछि अर्को गर्दै कोरोना संक्रमण देखिएपछि त्रासमा रहेको कचनकवल संक्रमितहरु उपचारपछि धमाधम घर फर्किन थालेपछि पुरानै अवस्थामा फर्किने प्रयासमा छ ।
अहिले त्रास कम हुँदै गएको अध्यक्ष आलमले बताए । ‘भारतबाट आएकालाई सिधैँ क्वारेन्टाइनमा लगिएकाले समुदायमा कोरोना भाइरस फैलिन पाएन’, उनले भने ।
