बन्द प्रशिक्षण सुरू गर्दै नेपाली राष्ट्रिय फुटबल टोली

काठमाडौँ । नेपाली राष्ट्रिय फुटबल टोलीको बन्द प्रशिक्षण आजदेखि हुँदैछ । बंगलादेशमा दुई मैत्रीपूर्ण खेल खेल्न जाने टोलीको प्रशिक्षण आजदेखि हुने टीम व्यवस्थापक मधुसूदन उपाध्यायले बताएका छन्।

नोभेम्बर १३ र १७ मा बंगलादेश राष्ट्रिय टोलीसँग नेपालले उसैको घरेलु मैदानमा दुई खेल खेल्नेछ। मंगलबार मात्रै एन्फाले बंगलादेश टुरका लागि मुख्य प्रशिक्षकको जिम्मेवारी बालगोपाल महर्जनलाई दिइसकेको छ।

मुख्य प्रशिक्षक योहान कालिन स्वीडेनमा रहेको र नेपाल आउन समस्या भएपछि महर्जनलाई जिम्मेवारी दिएको हो। अघिल्लो वर्ष नोभेम्बरमा नेपालले फिफा विश्वकप २०२२ तथा एएफसी एसियन कप २०२३ अन्तर्गत छनोट खेल खेलेको थियो।

नेपालले भुटानलाई न्युट्रल भेन्यु बनाएर नोभेम्बरमा अन्तिम अन्तर्राष्ट्रिय खेल खेलेको थियो। झण्डै १ वर्षपछि नेपालले अन्तर्राष्ट्रिय खेल खेल्दैछ।