काठमाडौं । आज भएको एन्फा महिला लिगमा दुवै खेल बराबरीमा रोकिएर अंक बाँडिएको छ । पहिलो खेलमा चन्द्रपुर नगरपालिका र कर्णाली प्रदेश तथा दोस्रो खेलमा विभागीय टोली एपीएफ एफसी नेपाल पुलिस क्लबले बराबरी खेलेका हुन् ।
पहिलो खेलमा चन्द्रपुर र कर्णालीले १-१ को बराबरी खेल्दै लिग सुरुवात गरे । यस्तै, एपीएफ र पुलिसले गोलरहित बराबरी खेलेर अंक बाँडेका छन् ।
कर्णालीका लागि सातौं मिनेटमा सुनकला राईले गोल गर्दै टोलीलाई अग्रता दिलाएकी थिइन् । पहिलो हाफको इन्ज्युरी समयमा रजनी थोकरले गोल गर्दै खेललाई बराबरीमा पुर्याइन् ।
यसैगरी, पुलिस र एपीएफले गोलरहित बराबरी खेल्दै लिग सुरुवात गरे । विभागीय डर्बीमा साविक विजेतासमेत रहेको एपीएफले धरै मौका सिर्जना गरे पनि सफलता मिलेन ।
भारी वर्षाका कारण खेल ४ बजेको सट्टा ४ः३० बजे सुरु भएको थियो । बुधबार लिगमा हुने एक मात्र खेलमा संकटा क्लब र त्रिभुवन आर्मी फुटबल क्लबबीच प्रतिस्पर्धा हुनेछ ।