इटहरी । झापाको शनिश्चरे एफसी यहाँ जारी प्रदेश १ जिल्लास्तरीय नकआउट फुटबल प्रतियोगिताको सेमिफाइनलमा प्रवेश गरेका छन् । शनिश्चरे एफसी झापा जिल्ला लिग च्याम्पियन टोली हो ।
आइतबार सम्पन्न भएको दोस्रो तथा अन्तिम क्वाटरफाइनल खेलमा शनिश्चरेले बाक्सिला फुटबल क्लब, खोटाङलाई ४–२ ले हरायो र सेमिफाइनलमा प्रवेश गर्न सफल भयो ।
इटहरी रंगशालामा सम्पन्न खेलमा शनिश्चरेका लागि श्याम मुर्मुले दुई गोल गरे भने सौरभ लिम्बू र पुजन राईले एक–एक गोल गरे । उता पराजित बाक्सिलाका लागि प्रशान्त राई र बिक्की राईले गोल गरे ।
खेलमा दुई गोल गरेका शनिश्चरेका श्याम मुर्मु म्यान अफ द म्याच समेत चुनिए । उनलाई खेलका प्रमुख अतिथि दिवस पोख्रेलले नगद २१ सय र मेडलका साथ पुरस्कृत गरे ।
यस्तै, देउराली एफसी, धनकुटाले रेडहर्ष एफसी, इलामलाई शून्यका विरुद्ध १ गोलले हराउँदै अन्तिम चारमा प्रवेश गरेको हो । इटहरी रंगशालामा सम्पन्न खेलमा देउरालीका लागि योगेश लिम्बूले एक मात्र निर्णायक गोल गरे ।
निर्णायक गोलकर्ता योगेश लिम्बू खेलको म्यान अफ द म्याच समेत चुनिए । उनलाई खेलका प्रमुख अतिथि रितेश श्रेष्ठले नगद २१ सय र मेडलका साथ पुरस्कृत गरे ।
प्रतियोगिता अन्तरगत जेठ ३० गते सोमबारको पहिलो सेमिफाइनल खेल मोतीराम फुटबल क्लब, मोरङ र धरान फुटबल क्लब, सुनसरीबीच हुने आयोजकले जानकारी दियो ।
प्रदेश खेलकुद बोर्ड, बिराटनगरको आयोजना तथा इटहरी फुटबल क्लब, सुनसरीको संयोजनमा जारी प्रतियोगिताको विजेताले उपाधिसहित नगद २ लाख हात पार्नेछ भने उपविजेताले १ लाख प्राप्त गर्नेछ । फाइनल खेल असार १ गतेका दिन हुनेछ ।