झापा । मनसुनी गतिविधि कम भएसँगै पानी पर्ने क्रम घटेको छ । अघिल्लो हप्ता लगातारजसो पानी परे पनि अहिले लगातार पानी परेको छैन । देशका केही ठाउँमा भने हल्कादेखि मध्यम वर्षा भइरहेको छ ।
आज पनि कोशी, बाग्मती र गण्डकी प्रदेशका पहाडी क्षेत्रमा हल्कादेखि मध्यम वर्षाको सम्भावना रहेको मौसमविद् प्रतिभा मानन्धरले जानकारी दिइन् । अन्य क्षेत्रका एक दुई ठाउँमा पनि हल्का पानी पर्ने अनुमान रहेको उनले बताइन् ।
उनका अनुसार मनसुनको न्यून चापीय रेखा सरदर स्थानभन्दा केही तल छ । यसले गर्दा तत्काल ठूलो पानी पर्ने सम्भावना छैन । अहिले देशका धेरै ठाउँको मौसम आंशिकदेखि सामान्य बदली छ ।
