अर्जुनधारा । झापाको अर्जुनधारामा सोमबार आयोजित एक कार्यक्रमका सहभागीहरुले सरसफाई प्रबद्र्धन कार्यक्रम अन्तर्गतका स्वस्थ्यकर व्यवहारहरु कार्यान्वयन गराउने प्रतिबद्धता व्यक्त गरेका छन् ।
नगर स्वास्थ्य शाखाद्वारा आयोजित नियमित खोप सुदृढीकरण एवम् पूर्ण खोप सुनिश्चतता तथा योजना तर्जुमा गोष्ठी कार्यक्रमका सहभागी जनप्रतिनिधि, स्वास्थ्यकर्मी र सञ्चारकर्मीहरुले उक्त स्वस्थ्यकर व्यवहारहरु कार्यान्वयन गराउने प्रतिबद्धता व्यक्त गरेका हुन् ।
‘स्वच्छ परिवार सुखको आधार’ भन्ने नारासहित नमूना परिवार बनाउने उद्धेश्यले आयोजित कार्यक्रममा स्वस्थ्यकर व्यवहारहरुमा ६ महिनाको उमेरसम्म स्तनपान मात्र गराउने, राम्ररी पकाएको र सुरक्षित खाना खुवाउने, साबुन पानीले मिचिमिचि हात धुने, दूध र पानी उमालेको मात्र खुवाउने, सधैं सफा चर्पीको प्रयोग गर्ने तथा बच्चाको दिसा चर्पीमा मात्र फाल्ने, बच्चालाई १५ महिनाको उमेरभित्र लगाउनु पर्ने र सबै खोप तोकिएको तालिकाअनुसार लगाउने रहेका छन् ।
नगर उपप्रमुख कमला खतिवडा आचार्यले प्रतिबद्धता वाचन गरेको कार्यक्रमको सहजीकरण स्वास्थ्य कार्यालय झापाका खोप कार्यक्रम प्रमुख बालकृष्ण भण्डारीले गरेका थिए । नगर प्रमुख हरिकुमार रानाको अध्यक्षतामा आयोजित कार्यक्रमको सञ्चालन स्वास्थ्य शाखा संयोजक मुकुन्द बस्नेतले गरेका थिए ।
