झापा । सशस्त्र प्रहरीले झापा गाउँपालिकाको सितुमारी ईलाकाबाट ठूलो मात्रामा ब्राउन सुगरसहित एक जनालाई पक्राउ गरेको छ । पक्राउ पर्ने युवा भारतीय नागरिक रहेका छन् ।
पक्राउ पर्नेमा भारत जिल्ला किशनगञ्ज धनतोला ग्रामपञ्चायत बालुवाडी बस्ने वर्ष २३ का राहुल मण्डल रहेको सशस्त्र प्रहरी बल नेपाल नम्बर २ गण हेडक्वाटर झापाका डीएसपी तथा सूचना अधिकारी दिनेश कटुवालले जानकारी दिए । उनको साथबाट ४८.५५० ग्राम ब्राउनसुगर बरामद भएको हो ।
झापा १ सितुमारीस्थित सशस्त्र प्रहरी बल नेपाल बोर्डर आउट पोष्ट टाघनडुब्बाबाट सशस्त्र प्रहरी निरीक्षक श्यामकुमार थापाको कमाण्डमा खटिएको मोवाइल गस्ती टोलीले आज दिउँसो १ बजेको समयमा मोटरसाइकलमा सवार मण्डललाई शंका लागेर चेकजाँच गर्दा उनको साथबाट त्यति परिमाणमा ब्राउनसुगर फेला परेको थियो ।
सशस्त्र प्रहरी बल नेपालले बीआर ३७ एन ५८११ भारतीय नम्बरको मोटरसाइकल, मोबाईल १ थान, भारतीय रुपैयाँ २१००, ब्राउनसुगर र पक्राउ परेका ब्यक्तिलाई थप अनुसन्धान तथा कारबाहीको लागि इलाका प्रहरी कार्यालय कुमरखोदमा बुझाएको जनाइएको छ ।
