ह्वाकु (तेह्रथुम) । लामा गुरुङ एकता समाज र श्रीजङ राय पापो समाज ह्वाकु यहाँ जारी श्रीजङ राय स्मृति फुटबल प्रतियोगिताको फाइनलमा प्रवेश गरेका छन् ।
माैलाडाँडा खेलमैदानमा आज भएको छैटौ संस्करणको दुई सेमिफाइनल खेलबाट लामा गुरुङ एकता समाज र श्रीजङ राय पापो समाज फाइनलमा प्रवेश गरेका हुन् ।
पहिलो सेमिफाइनल खेलमा लामा समाजले श्रीजङ राय पापो समाजको बी टिमलाई टाइबेकरमा ४-३ गोलअन्तरले पराजित गरेको हो । निर्धारित समयमा दुवै टोलीले १-१ गोलको बराबर िखेलेका थिए ।
खेलको २७औँ मिनेटमा पापो समाजका तरङ इङनामले गोल गर्दै अग्रता दिलाएका थिए । तर, लामा समाजका सागर श्रेष्ठले खेलको ३९औँ मिनेटमा बराबरी गोल फर्काएपछि खेल टाइब्रेकरमा धकेलिएको थियो ।
टाइब्रेकरमा पापो समाजका कप्तान रोशन इङनामको प्रहार पोलमा लाग्दै बाहिरियो भने गोलरक्षक मिराक खजुमको प्रहार पनि बाहिरिएको थियो । तरङ इङनाम, सन्तोष गुरूङ र टासी लामाको प्रहारमात्र गोलमा परिणत भयो ।
लामा समाजका लागि सुबास तामाङ, सन्तोष खजुम, सागर श्रेष्ठ र गौरव गुरूङको प्रहार गोलमा परिणत हुँदा गोलरक्षाक तथा कप्तान प्रेम लिम्बूको प्रहार पापो समाजका गोलरक्षक मिराक खजुमले रोकेका थिए । खेलको प्लेयर अफ दी म्याच प्रेम लिम्बू भए ।
अन्तिम सेमिफाइनल खेलमा पापो समाजको ए टिमले जलकन्या एफसीमाथि २-१ गोलको कठिन जित निकालेर फाइनलमा स्थान सुरक्षित गरेको हो । पापो समाजका लागि पहिलो हाफमै २ गोल सम्भव भएको थियो ।
खेलको २६औँ मिनेटमा पापो समाजका सुमन लिम्बूले गोल गर्दै अग्रता दिलाएका थिए । यस्तै, २८औँ मिनेटमा दिप्सन लिम्बूले टोलीको अग्रता दोब्बर बनाएका हुन् ।
जलकन्याका लागि पासाङ शेर्पाले खेलको ५९औँ मिनेटमा सान्त्वना गोल फर्काएका हुन् । खेलको प्लेयर अफ दी म्याच पापो समाजका दिप्सन लिम्बू भए । उनले नगद १ हजारसहित ट्रफी पाए ।
इङनाम इवाहाङ युवा समाजले आयोजना गरेको प्रतियोगितामा १६ वटा टोलीको सहभागिता रहेको थियो । प्रतियोगिताको विजेताले नगद १ लाख २५ हजार ५५५ र उपविजेताले नगद ७५ हजार ५५५ सहित ट्रफी पाउने छ ।
आयोजक कमिटीका अध्यक्ष किशोरचन्द्र इङनामका अनुसार सर्वोकृष्ट खेलाडीले ५ हजार पाउँदा विधागत पुरस्कार ३९३ हजार रहेको छ । प्रतियोगिताको फाइनल खेल माघ ६ गते हुनेछ ।
