भुवनेश्वर/नयाँदिल्ली, (एजेन्सी)
भीषण वर्षा तथा करिब २ सय २५ किलोमिटर प्रतिघण्टा वेगको हुरीसँगै आएको चक्रवात ‘फनी’ शुक्रबार बिहान भारतको उडिसा प्रान्तमा प्रवेश गरेको र त्यसले तटीय इलाकामा जनजीवन व्यापक प्रभावित पारेको छ। उक्त सामुद्रिक आँधीका कारण अहिलेसम्म ३ जनाको मृत्यु भइसकेको र करिब १ सय ६० जना घाइते भएको उडिसाका स्थानीय अधिकारीले जानकारी दिएका छन्।
उडिसामा विद्युत् आपूर्तिलगायत टेलिफोन तथा यातायात सेवा पूरै ध्वस्त भएका छन्। विभिन्न इलाकामा रूख तथा पोलहरू ढलेका छन् भने कयौं ठाउँ डुबानमा परेको र प्रायः झुपडीहरु तहसनहस भएका छन्।
चक्रवातका कारण तटीय क्षेत्रबाट करिब १२ लाख नागरिकलाई सुरक्षित स्थानमा पुर्याइएका छन्। अहिलेसम्म क्षतिको अनुमान हुन सकेको छैन। यद्यपि चक्रवातको हावाको वेग कमजोर हुँदै गइरहेको मौसमविद्ले जानकारी दिएका छन्। यो भारतमा आएका सामुद्रिक चक्रवातमध्ये तीन दशक यताको सबैभन्दा शक्तिशाली भएको जनाइएको छ।
उक्त चक्रवात शुक्रबार बिहान करिब ८ बजे उडिसाको पुरीमा पुगेको थियो। यो शुरूआतमा १ सय ७५ किलोमिटर प्रतिघण्टा हावाको वेगसहित प्रवेश गरेको र २ सय ४५ किलोमिटर प्रतिघण्टा वेगसम्म पुगेको बताइएको छ। चक्रवात पुग्ने क्रमको प्रक्रिया पूरा हुन करिब ३ घण्टा लागेको मौसम विभागले जनाएको छ। फनी चक्रवातका कारण उडिसाको बिजु पटनायक इन्टरनेसनल एयरपोर्टलाई पनि ठूलो क्षति पुर्याएको छ। चक्रवातको मार्गमा पर्ने जोखिमपूर्ण तटीय इलाकाबाट करिब १२ लाख नागरिकलाई सुरक्षित स्थान सारिसकेका छन्।
यसमा करिब ११ लाखलाई बिहीबार नै सुरक्षित स्थानमा पुर्याइएका थिए। करिब १० हजार गाउँ र ५२ शहरी इलाकाबाट उनीहरुलाई स्थानान्तरण गरिएको हो। चक्रवातका लागि ८ सय ८० केन्द्र बनाइएको र करिब ११ लाख नागरिक ४ हजार शिविरमा आश्रय लिइरहेको बताइएको छ।
राजधानी भुवनेश्वरमा करिब १ सय ४० किलोमिटर प्रतिघण्टा वेगले हावाहुरी चलेको मौसम विभागका अधिकारीहरुले बताए। भुवनेश्वरमा कयौं स्थानमा रूख ढलेको र जनजीवन प्रभावित भएको प्रहरी बताए।
हाल यो सामुद्रिक चक्रवात उडिसाबाट पश्चिम बंगालतर्फ बढिरहेको छ। पश्चिम बंगालमा हुरीका वेग १ सय २५ किलोमिटर प्रतिघण्टा रहेको बताइएको छ।
