काठमाडौँ । नेपालमा कोरोना संक्रमितको संख्या ४ हजार नाघ्दा इलाम जिल्लामा पनि संक्रमण देखिएको छ । इलाम जिल्लामा पहिलो पटक संक्रमण देखिएको हो । यो सँगै संक्रमित भएका जिल्लाको संख्या ७२ पुगेको छ ।

स्वास्थ्य तथा जनसंख्या मन्त्रालयले मंगलबार आयोजना गरेको पत्रकार सम्मेलनमा उक्त जानकारी दिइएको हो । पछिल्लो २४ घन्टामा ३२३ जनामा संक्रमण पुष्टि भएसँगै ४ हजार ८५ जना पुगेको हो ।

मन्त्रालयका प्रवक्ता डा जागेश्वर गौतमका अनुसार संक्रमित हुनेमा प्रादेशिक जनस्वास्थ्य प्रयोगशाला विराटनगरमा गरिएको परीक्षणमा इलामका एक व्यक्तिमा संक्रमण देखिएको हो । संक्रमित व्यक्ति भारतबाट नेपाल आएका हुन् । प्रदेश १ मा कोरोना भाइरस संक्रमित जिल्ला १३ पुगेको छ ।

त्यस्तै, विराटनगरमा ३ जना, सुनसरीका १ जना, सप्तरीका ७ जना, चितवनका २४ जना, नवलपुरका १५ जना, धादिङका १ जना, कपिलवस्तुका १० जना, म्याग्दीका १ जना, बागलुङ ११ जना र धनुषाका ४५ जना रहेका छन् ।

त्यसैगरी महोत्तरीका ५० जना, सर्लाहीका १ जना, दाङका ६ जना, बाँकेका ९ जना, जुम्लाका २ जना, सल्यानका १२ जना, सुर्खेतका ४ जना, दार्चुलाका १० जना, कन्चनपुरका १९ जना, डडेलधुराका ७ जना, कैलालीका १ जना, रुपन्देहीका २० जना, नुवाकोटका २ जना, रौटहटका २१ जना, सर्लाही १६ जना र सिरहाका १२ जनामा संक्रमण देखिएको छ ।