भद्रपुर । भारतबाट अवैधरुपमा नेपाल भित्राइ भन्सार छलेर ल्याएको धुलो सुर्तीसहित इलेक्ट्रिक ट्याम्पो र चालकलाई झापा प्रहरीले नियन्त्रणमा लिएर भन्सार बुझाएको छ ।

 

वडा प्रहरी कार्यालय भद्रपुरबाट खटिएको प्रहरी टोलीले विशेष सूचनाको आधारमा भद्रपुर नगरपालिका ३ स्थित ज्ञानेचोकमा आइतबार साँझ ६ः४० मिनेटमा प्र १-०१-००२ ह २१६० नम्बरको इलेक्ट्रिक ट्याम्पोलाई रोकेर चेकजाँच गरेका थिए ।

 

प्रहरीले सो ट्याम्पोमा भारतबाट अवैधरुपमा नेपाल भित्राइएको सात बोरा धुलो सुर्ती बरामद गरेको जिल्ला प्रहरी कार्यालय झापाले जनाएको छ ।

 

प्रहरीले बरामद गरिएको सुर्ती, ट्याम्पो र ट्याम्पो चालक हल्दिवारी गाउँपालिका-२ का ४० वर्षीय हरिपलाल राजवंशीलाई ६ लाख ७० हजार मूल्याङ्कन तोकेर सोमबार भद्रपुर भन्सार कार्यालय बुझाइसकेको छ । ट्याम्पो चालक राजवंशी भने एक लाख ७० हजार धरौटी बुझाएर छुटेका छन् ।