अर्जुनधारा । झापा अर्जुनधाराका एक ब्यक्तिको शव अन्त्येष्टि गरिसकेपछि उनलाई कोरोना संक्रमण पुष्टि भएको छ ।
अर्जुनधारा नगरपालिका वडा नं ७ का ६१ वर्षिय भीम काफ्लेको शवलाई अन्त्येष्टि गरिसकेपछि उनलाई कोरोना संक्रमण पुष्टि भएको हो । बिएण्डसी हस्पिटल बिर्तामोडमा दुई दिनअघि पिसिआर परीक्षण गराएका काफ्लेको गएराति ९ः३० बजेतिर घरैमा मृत्यु भएको थियो ।
मृत्युपछि आज बिहान ९ बजेतिर परिवार र आफन्तले उनको स्थानीय टाङटिङ नदीमा दाहसँस्कार गरेका थिए । दाहसँस्कार भइसकेपछि आज दिउँसो १ बजेतिर उनको पिसिआर रिपोर्ट पोजेटिभ आएको हो । आफन्तहरुले संक्रमित काफ्लेलाई अरुसरह नै दाहसँस्कार गरेका थिए ।
पिसिआर परीक्षण गरेको थाहा भए पनि रिपोर्ट नआएका कारण अरुसरह नै दाहसँस्कार गरिएको वडाध्यक्ष नवीन ढुंगानाले बताए ।
योसँगै अर्जुनधारामा कोरोना संक्रमणबाट मृत्यु हुनेको सँख्या ३ पुगेको छ भने जिल्लामा ७६ भएको छ । आजै कमल र शिवसताक्षीका एक–एक जनाको कोरोना संक्रमणबाट मृत्यु भएको छ ।
