झापा । झापा अर्जुनधारा–११ स्थित नयाँ बसपार्क छेउको एक होटलबाट लागुऔषध ब्राउनसुगरसहित छ जनालाई प्रहरीले पक्राउ गरेको छ ।
पक्राउ पर्नेमा पाँचथरको फाल्गुनन्द–३ का २५ वर्षीय विवेक तामाङ, २१ वर्षीय समिर लिम्बू, २४ वर्षीय सञ्जु चेम्जोङ, १८ वर्षीय दिपेन नेम्वाङ, झापा अर्जुनधारा–६ का १८ वर्षीय रोशन गुरुङ र इलामका २० वर्षीय सन्तोष तामाङ रहेका छन् ।
बिशेष सुराकीको आधारमा इलाका प्रहरी कार्यालय अनारमनीबाट खटिएको प्रहरी टोलीले बसपार्कमै रहेको माउन्ट मेची होटलको एक कोठामा चेकजाँच गर्ने क्रममा ३९.२९ ग्राम ब्राउनसुगरजस्तो देखिने खैरो पदार्थ थालमा राखेको अवस्थामा बरामद गरेको थियो ।
पक्राउ परेका छ जनालाइ इप्रकामा राखी थप अनुसन्धान भइरहेको डीएसपी मुकुन्द रिजालले जानकारी दिए ।
प्रहरीले गत जेठदेखि फागुन २१ सम्म बिर्तामोड क्षेत्रबाट मात्रै लागूऔषध प्रयोगकर्ता तथा कारोबारी गरी ५६ जनालाई पक्राउ गरेको डीएसपी रिजालले जानकारी दिए ।
यो अवधिमा ४ सय ७९.४२० ग्राम ब्राउन सुगर बरामद गरेको उनले बताए । यही अवधिमा लागूऔषध ६ सय एम्पुल, ७६ वटा ट्याब्लेट र ८ सय ग्राम गाँजासमेत बरामद गरेको डीएसपी रिजालको भनाइ छ ।
