झापा । पत्रकारको प्रेस ज्याकेट लगाएर प्रहरीमाथि ढुंगामुढा गर्ने व्यक्ति ललितपुरको भएको खुलेको छ । उनलाई प्रहरीले शुक्रबार पक्राउ गरेको छ ।
महालक्ष्मी नगरपालिका १ का २१ वर्षीय अनिश महर्जनलाई प्रहरीले इमाडोलबाट पक्राउ गरेको हो । बिहीबार ललितपुरमा भएको झडपमा पत्रकारको ज्याकेट लगाएर उनले प्रहरीलाई ढुंगा हानेको भिडियो अहिले सामाजिक सञ्जालमा भाइरल बनेको छ ।
महर्जनलाई इमाडोलबाट अपराध महशाखाको टोलीले पक्राउ गरेको महाशाखा प्रमुख एसएसपी दीपक थापाले जानकारी दिए ।
उनी पत्रकार नभएको खुलेको छ । उनले प्रहरीलाई ढुंगा हानेको भिडियो सार्वजनिक भएपछि प्रहरीले अनुसन्धान थालेको थियो ।
महर्जनले प्रेस ज्याकेट लगाएर एक हातमा क्यामरा बोकेका छन् भने देब्रे हातले ढुंगा टिपेर प्रहरीमाथि प्रहार गरेको भिडियो सामाजिक सञ्जालमा भाइरल बनेको छ ।
पुल्चोकमा भएको झडप प्रकरणमा प्रहरीले महर्जनसहित १३ जनालाई पक्राउ गर्न सफल भएको छ ।
