झापा । झापामा थप तीन जना कोरोना संक्रमितको मृत्यु भएको छ । एक जनाले आत्महत्या गरेका छन् भने दुई जनाको मृत्यु भएको छ । दमककी एक कोरोना सक्रमित युवतीले झुन्डिएर आत्महत्या गरेकी हुन् ।
दमक नगरपालिका वडा नं ५ निवासी पंचबहादुर लिम्बुकी २२ वर्षिया छोरी दीक्षाले गएराति झुन्डिएर आत्महत्या गरेकी हुन् । उनलाई कात्तिक १७ गते विराटनगरको बीसियर ल्याबमा गरिएको पिसिआर परीक्षणमा पोजेटिभ देखिएको थियो । त्यसपछि उनी होम आइसोलेसनमा बस्दै आएकी थिइन् ।
आफू सुत्ने कोठोमा रहेको सिलिङ फेनको हुकमा सलको पासो लगाएर उनले आत्महत्या गरेको इलाका प्रहरी कार्यालय दमकका प्रहरी नायव उपरीक्षक विजयराज पण्डितले बताए ।
त्यस्तै दमकका थप एक जना कोरोना संक्रमितको मृत्यु भएको छ । मृत्यु हुनेमा दमक नगरपालिका वडा नं १ का ६५ वर्षिय फौदसिंह राई रहेका छन् । उनको विराटनगरको नोवेल हस्पिटलमा आज विहान ३ बजे मृत्यु भएको हो । उपचारका क्रममा उनलाई कात्तिक १२ गते नोवेलमै संक्रमण पुष्टि भएको थियो ।
त्यस्तै मेचीनगर नगरपालिका वडा नं १४ का एक ७० वर्षिय बृद्धको उपचारका क्रममा मेची अस्पताल भद्रपुरमा मृत्यु भएको छ । कात्तिक १५ गते संक्रमण पुष्टि भएका ७० वर्षिय देवी चिमरिया अस्पतालको आइसोलेसनमा उपचाररत् थिए । उनको आज विहान ७ः५० बजे मृत्यु भएको हो । योसँगै झापामा कोरोना संक्रमणबाट मृत्यु हुनेको सँख्या ५७ पुगेको छ ।
