झापा । झापामा कोरोना संक्रमणबाट मृत्यु हुनेको संख्या एक सय नाघेको छ । हिजो मंगलबार तीन जनाको मृत्यु भएसँगै एक सय नाघेको हो ।
सोमबार दुई जनाले संक्रमणका कारण ज्यान गुमाएका थिए । त्यस्तै आइतबार तीन जनाको मृत्यु भयो । यसरी हेर्दाखेरि झापामा कोरोना संक्रमणबाट नमरेको कुनै पनि दिन छैन ।
हरेक दिन कोरोना कालले मानिसको ज्यान लिइरहेको छ । मृत्युदरलाई हेर्ने हो भने जिल्लामा दैनिक २ देखि ३ जनाको दरले मृत्यु हुने गरेको छ । संक्रमितको सँख्या पनि त्यत्तिकै बढिरहेको छ ।
मंगलबार १११ जनामा संक्रमण पुष्टि भएको थियो । यस्तै, सोमबार ९० जनामा संक्रमण देखिएको थियो । संक्रमण दर र संक्रमणबाट मृत्यु दर बृद्धि हुँदै गएको हो । मंगलबारसम्मको तथ्यांकलाई हेर्दा जिल्लाका १०१ जनाले कोरोना संक्रमणबाट ज्यान गुमाइसकेका छन् ।
मृतकको शव व्यवस्थापन गर्ने गरेको नेपाली सेनाले दिएको यो तथ्यांक हो । जिल्ला स्वास्थ्य कार्यालयको तथ्यांकले पनि १०१ देखाएको छ । मंसिर ४ गते मृतक सँख्या ९० रहेकोमा त्यसयता पाँच दिनमा ११ जनाको मृत्यु भएको हो ।
