एजेन्सी । भारतको राजधानी नयाँ दिल्लीमा कोरोना संक्रमितबाट बढ्दो मृत्यु दरका कारण दाहसंस्कार गर्ने ठाउंको चरम अभाव देखिएको छ ।
शव जलाउने ठाउँको अभाव भएपछि सार्वजनिक पार्कहरुमा समेत शवदाह गृह निर्माण गर्न थालिएको छ । कोरोना संक्रमणको घातक दोस्रो छालले सबैभन्दा बढी मार खेपिरहेको दिल्लीमा पार्किंङ स्थल, पार्क वा खाली मैदान, दाहसंस्कारको बढ्दो आवश्यकताका लागि खोजी भईरहेको अधिकारीहरुले जनाएका छन् ।
दाहसंस्कारका लागि समेत परिवारजनले घण्टौं कुर्नु पर्ने अबस्था छ । पछिल्लो २४ घण्टामा दिल्लीमा ३ सय ८० जनाको कोरोनाका कारण मृत्यु भएको छ ।
करिव २ करोड जनसंख्याको रहेको दिल्लीका अस्पतालहरू संक्रमितले भरिएका छन् भने चिकित्सक र अक्सिजनको अभावले मृतकको संख्या बढ्दो छ ।
यता दिल्ली सरकारले बैंककबाट १८ वटा अक्सिजनको ट्याङ्कर मगाउने निर्णय गरेको छ । मगाइएको ट्याङ्कर भोलिदेखि आउन थाल्ने मुख्यमन्त्री अरविन्द केजरीवालले बताउनुभयो ।
उहाँले बैंककबाट अक्सिजनको ट्याङ्कर ल्याउनका लागि केन्द्र सरकारसँग एयरफोर्स विमान उपलब्ध गराइदिन आग्रह गर्नुभएको छ ।
फ्रान्सबाट २१ वटा तत्काल प्रयोग गर्न मिल्ने अक्सिजन प्लान्ट आयात गर्न लागेको बताउँदै केजरीवालले त्यसले दिल्लीमा अक्सिजनको समस्या समाधान गर्ने बताउनुभयो ।
यसैबीच भारतमा लगातार छैटौं दिन ३ लाखभन्दा बढीमा संक्रमण पुष्टि भएको छ । पछिल्लो चौबीस घण्टामा ३ लाख २३ हजार १ सय ४४ जनामा संक्रमण पुष्टि भएको हो ।
जुन अघिल्लो दिनको तुलनामा ३० हजारले कम हो । त्यसैगरी पछिल्लो २४ घण्टामा भारतर २ हजार ७ सय ७१ जनाको कोरोनाका कारण मृत्यु छ ।
अहिले भारतमा सक्रिय संक्रमितको संख्या २८ लाख ८२ हजारभन्दा बढी छ । नेपालसँग सीमा जोडिएका भारतीय राज्यहरूमा पनि संक्रमण बढिरहेको छ ।
पछिल्लो २४ घण्टामा उत्तर प्रदेशमा २६ हजार ७ सय १९ जनामा संक्रमण र २ सय ४९ जनाको मृत्यु भएको छ । पश्चिम बंगालमा ९ हजार ७ सय बढीमा संक्रमण र ६८ जनाको मृत्यु भएको छ ।
त्यस्तै बिहारमा ९ हजार २ सय २८ जनामा संक्रमण र ६७ जनाको मृत्यु भएको छ । भारतमा आगामी मे १ देखि १८ वर्ष माथिका सबै उमेर समूहका लागि खोप लगाउने तयारी गरिएको छ । यसबाट संक्रमणको दरमा कमी आउने अपेक्षा गरिएको छ ।
