झापा । स्वास्थ्य तथा जनसंख्या मन्त्रालयले झापासहित २२ जिल्लामा पछिल्लो समय कोरोना संक्रमण डरलाग्दो गरी फैलिएको बताएको छ ।

झापामा दैनिक ५० जनाभन्दा बढीमा कोरोना संक्रमण देखिँदै आएको छ । यो क्रम दिनानुदिन बढ्दो छ । कोभिड–१९ को संक्रमण नेपालमा हाल निकै नै उच्च गतिमा फैलिरहेको अवस्था रहेको मन्त्रालयले बताएको छ ।

आइतबार झापामा १८ जना संक्रमित थिए भने एक जना महिलाको मृत्यु समेत भएको थियो । सोमबार जिल्लामा १४ महिलासहित ३८ जनामा कोरोना भाइरस संक्रमण पुष्टि भएको थियो । मंगलबार जिल्लामा १० महिलासहित २६ जनामा कोरोना भाइरस संक्रमण पुष्टि भएको छ ।

बिहीबार झापामा २३ महिलासहित ५० जना कोरोना संक्रमित थिए भने १ जना पुरुषको मृत्यु भएको थियो । शुक्रबार ५८ जनामा संक्रमण पुष्टि भएको प्रदेश १ सरकारको सामाजिक विकास मन्त्रालयले जनाएको छ । झापामा सबैभन्दा बढी बिर्तामोडमा संक्रमण फैलिरहेको छ । त्यसपछि दमक, अर्जुनधारा, मेचीनगर, भद्रपुर छन् ।

कोभिड १९ संक्रमणका हिसाबले नेपालका अति प्रभावित २२ जिल्लाहरू मोरङ, सुनसरी, झापा, पर्सा, बारा, धनुषा, काठमाडौँ, भक्तपुर, ललितपुर, चितवन, मकवानपुर, काभ्रेपलाञ्चोक, कास्की, दाङ, बाँके, रुपन्देही, पाल्पा, बर्दिया, कपिलवस्तु सुर्खेत, कैलाली, कञ्चनपुरमा संक्रमण फैलने दर डरलाग्दो गरी बढिरहेको मन्त्रालयले जनाएको हो ।

मन्त्रालयले स्वास्थ्य प्रणालीले थेग्नै नसक्ने गरी संक्रमण बढेकोले अस्पतालमा राखेर हेरचाह गर्न अस्पतालमा शैय्या उपलब्ध गराउन नसकिने भइसकेको हुँदा सबैलाई समवेदनशील हुन हार्दिक अनुरोध गरेको छ ।