एजेन्सी । अन्ततः ११ दिन लामो रकेट र मिसाइल आक्रमणपछि इजरायल र प्यालेस्टाइन युद्धविरामका भएको छ । इजरायलको सुरक्षा क्याबिनेटले गाजामा युद्धविरामका लागि अनुमति दिएको छ ।
इजरायलले आधिकारिक विज्ञप्ति जारी गर्दै भनेको छ, ‘युद्धविरामको प्रस्ताव क्याबिनेटमा आएको थियो, आपसी सहमति र विना शर्त यसलाई लागू गर्ने निर्णय भएको छ ।’
समाचार एजेन्सी रोयटर्सका अनसार हमासको तर्फबाट आधिकारिक विज्ञप्तिमा युद्धविरामको जानकारी दिँदै स्थानीयसमय अनुसार बिहान २ बजे (नेपाली समयअनुसार बिहान पौने ५ बजे) देखि इजरायलसँग आपसी सहमतिमा युद्धविराम हुनेछ ।
११ दिनदेखि भएको युद्धमा प्यालेस्टाइनमा १ सयभन्दा बढि महिला र बालबालिकासहित २३२ जनाको मृत्यु हुँदा इजरायलमा २ बालबालिकासहित १२ जनाको मृत्यु भएको बीबीसीले जनाएको छ । पछिल्लो २४ घण्टामा २ बालबालिकासहित ११ प्यालेस्टाइनी मारिँदा १९० जना घाइते भएका छन् ।
संयुक्त राष्ट्रसंघका अनुसाार युद्धका कारण ९१ हजार जना विस्थापित भएका छन् । गाजाका १६ हजार ८ सय घरमा क्षति हुँदा १८ सय घरमा बस्न नमिल्ने गरी क्षति पुगेको छ भने १ हजारभन्दा बढी घर पूर्ण ध्वस्त भएको छ ।
युद्धविराम भएपछि प्यालेस्टाइनका सडकमा मानिसहरु निस्केर त्यसको उत्साह मनाएका छन् । उनीहरूले सडकमा निस्किएका फोटो तथा भिडियो सामाजिक सञ्जालमा पोस्ट गरेका छन् ।
युद्धविराम भएपछि अन्तर्राष्ट्रिय समुदायले पनि त्यसको स्वागत गरेका छन् । बेलायती प्रधानमन्त्री बोरिस जोनसनले युद्धविराम स्वागतयोग्य र महत्त्वपूर्ण कदम भएको बताउनुभएको छ । उहाँले यो महत्त्वपूर्ण कदमले सैयौं नागरिकको ज्यान जोगिएको उल्लेख गर्नुभयो ।
यस्तै अमेरिकाले आफू गाजाको पुनर्निमाणका लागि संयुक्त राष्ट्रसंघसँग मिलेर काम गर्न तयार रहेको बताउनुभएको छ । साथै उहाँले अमेरिका प्यालेस्टाइनको सरकारसँग मिलेर काम गर्ने जनाउँलै त्यसमा हमासको संलग्नता मञ्जुर नहुने बताउनुभयो ।
प्यालेस्टाइन र इजरायल दुवै देशका नागरिकले सुरक्षा, स्वतन्त्रता, लोकतन्त्र र समृद्धिको समान अधिकारको हैसियत राख्ने उहाँको भनाइ छ ।
