अर्जुनधारा । प्रहरीले झापाको बुद्धशान्ति गाउँपालिका १ होक्सेबाट अवैध सखुवाको काठ बरामद गरेको छ ।
शुक्रबार राति ८ बजे बुद्धशान्ति १ होक्सेबाट मे १ त २७४७ नम्बरको ट्रयाक्टरबाट प्रहरीले गोलिया १८ थानबराबर २६.७१ क्यूफिट र चिरान फेन्टा ९ थानबराबर १५.८६ क्यूफिट गरी जम्मा ४२.५६ क्यूफिट काठ बरामद गरेको हो ।
त्रिपालले छोपेर बुधबारेतर्फ ल्याउँदै गरेको अवस्थामा प्रहरीले उक्त काठ फेला पारेको जनाएको छ । इलाका प्रहरी कार्यालय बुधबारेबाट सादा पोशाकमा गएका प्रहरीलाई देखेर चालकले ट्रयाक्टर भगाउन खोजेका थिए ।
प्रहरीले ट्रयाक्टर नियन्त्रणमा लिई चावी खोसेपछि स्पेयर चावीले ट्रयाक्टर भगाए पनि बाटो नभेटेपछि ट्रयाक्टर छोडेर चालक भागेको स्थानीयले बताएका छन् । चालक तत्काल फरार रहेकोले खोजी भइरहेको जिल्ला प्रहरी कार्यालय झापाले जनाएको छ ।
बरामद ट्याक्टर र काठ आबश्यक कार्बाहीको लागि माई सव डिभिजन बन कार्यालय ईलामसंग समन्वय भईरहेको प्रहरीको भनाइ छ ।
