काठमाडौं । संसदीय समितिले कुवेतको जेलमा रहेका २१ जना नेपाली कामदारलाई तत्काल फिर्ता गर्न सरकारलाई निर्देशन दिएको छ । कामको खोजीमा कुवेतमा अवैधानिक ढंगले पुगेका २१ जना नेपाली कामदारलाई कुवेत सरकारले थुनामा राखेको छ ।
संसदको उद्योग, वाणिज्य र श्रम तथा उपभोक्ता हित समितिको आज बसेको बैठकले कुवेतमा थुनामा रहेका २१ जना नेपाली कामदारलाई तत्काल स्वदेश फर्काउन सरकारलाई निर्देशन दिएको हो ।
थुनामा रहेका उनीहरुको दण्ड जरिवाना तिरेर भए पनि तत्काल फिर्ता ल्याउन समितिले सरकारलाई निर्देशन दिएको समितिका सभापति विमलप्रसाद श्रीवास्तवले जानकारी दिए ।
बैठकमा परराष्ट्र सचिव शंकरदास बैरागीले २१ जना नेपालीलाई स्वदेश फर्काउन कुवेत स्थित नेपाली दुतावासमार्फत पहल भईरहेको बताए ।
थुनामा रहेका ती नेपालीहरुलाई फर्काउन ५४ लाख रुपैयाँभन्दा बढी जरिवान तिर्नुपर्ने कुवेतस्थित नेपाली दुतावासले जनाएको छ ।
