अमित खम्बू,
झापा । नेपालका लागि नौलो फलको रुपमा रहेको ड्रागन फलको व्यावसायिक खेती झापाको अर्जुनधारामा सुरु गरिएको छ ।
दक्षिण अमेरिकाको मेक्सिकोमा उत्पत्ति भएको सिउँडी प्रजातिमा पर्ने उक्त फलको अर्जुनधारा–९ निवासी फलफूल कृषक दीनानाथ शिवाकोटीले व्यावसायिकरुपमा खेती सुरु गरेका हुन् । उनी स्थानीय शिव बाबा अचार उद्योगका सञ्चालक पनि हुन् ।
नगरका केही स्थानमा आंशिकरुपमा ड्रागन फलको केही बिरुवा रोपिए पनि व्यावसायिकरुपमा भने आफूले पहिलोपटक यसको सुरुवात गरेको कृषक शिवाकोटीले दावी गरे ।
हाल ५१ वटा पोलबाट बिरुवा रोप्न सुरु गरेका उनले आगामी दिनमा पाँच सय वटा पोलमा दुई हजार बिरुवा रोप्ने लक्ष्य लिएका छन् । प्रत्येक पोलमा चारवटा विरुवा रोप्न सकिने एक पोल बराबर लागत मूल्य १३ सय रुपैयाँ रहेको उनले जानकारी दिए ।
ड्रागन फलको तीन जातिमध्ये छनौट भएका उत्कृष्ट ग्रेडका बिरुवाहरु आफूले रोपेको उनी बताउँछन् । त्यसैगरी तत्काल शिव बाबा कृषि फार्म तथा नर्सरी प्लान्ट दर्ता गरी ड्रागन फलको खेतीसँगै अन्य इच्छुक कृषकहरुको लागि बिरुवा उत्पादन, प्राविधिकहरुको सहकार्य, बजार व्यवस्थापनमा सहयोग पु¥याउने उनले बताए ।
जस्तोसुकै माटोमा खेती गर्न सकिने क्यान्सर प्रतिरोधात्मक गुण रहेको यस फलमा १२ प्रकारका भिटामिन र मिनिरल्स पाइने बताइएको छ । प्राविधिकका अनुसार बिरुवा रोपिएको दुई वर्षमा फल लाग्ने उक्त फलको फूल रातिमात्र फुल्ने गरेको पाइन्छ । १५० देखि एक किलोग्रामसम्म फल्ने उक्त फल प्रतिकेजी पाँच सयदेखि एक हजार रुपैयाँ मूल्यमा बिक्री हुने गरेको बताइएको छ ।
अन्य देशमा व्यावसायिकरुपमा स्थापित भएको यो फल २०५७ सालमा पशु चिकित्सक डा जगन्नाथ राईले अमेरिकी इन्जिनियर साथीमार्फत् भियतनामबाट नेपाल भित्र्याएका हुन् ।
यसैबीच कृषक शिवाकोटीले सुरु गरेको ड्रागन फलको सोमबार एक कार्यक्रमका बीच उद्घाटन गरिएको छ । नगर प्रमुख हरिकुमार राना र वडाध्यक्ष पुष्पकुमार प्रसाईंले संयुक्तरुपमा उक्त फलको बिरुवा रोपेर कार्यक्रमको उद्घाटन गरेका थिए ।
