झापा । नेपाल खेलकुद महासंघको केन्द्रीय सचिवालय सदस्य तथा १ नं. प्रदेश प्रमुखमा झापाका शंकर थापा निर्वाचित भएका छन् ।
नेकपा एमाले निकट जनवर्गीय संगठनले काठमाडौंको बानेश्वरमा आयोजना गरेको राष्ट्रिय भेलाले उनलाई सो जिम्मेवारी प्रदान गरेको हो । महासंघ केन्द्रको भेलाबाट निर्वाचित थापा झापा जिल्ला खेलकुद विकास समितिका निवर्तमान अध्यक्षसमेत हुन् ।
सो भेलाले महासंघका संस्थापक अध्यक्षसमेत रहेका पूर्व युवा तथा खेलकुद मन्त्री पुरुषोत्तम पौडेललाई पुनः अध्यक्षमा निर्वाचित गरेको छ ।
त्यस्तै, उक्त भेलाबाट महासंघका संस्थापक प्रथम उपाध्यक्ष तथा राष्ट्रिय खेलकुद परिषद्का निवर्तमान सदस्य सचिव केशवकुमार विष्ट पुनः प्रथम उपाध्यक्षमा निर्वाचित भएका छन् । सुनसरीका विष्टले महासंघको १ नं. प्रदेश इञ्चार्जको जिम्मेवारी पाएका छन् ।
त्यसैगरी, भेलाबाट केन्द्रीय सचिवालय सदस्य तथा १ नं. प्रदेशको सह इञ्चार्जमा रविन नगरकोटी निर्वाचित भए । मोरङका उनी पूर्वाञ्चल क्षेत्रीय खेलकुद विकास समितिका पूर्व अध्यक्ष हुन् ।
यस्तै, भेलाले केन्द्रीय सचिवालय सदस्य तथा झापा जिल्ला इञ्चार्जमा धर्मराज शिवाकोटी, केन्द्रीय सदस्य तथा झापा जिल्ला सह इञ्चार्जमा अर्जुन मेचे र केन्द्रीय सदस्यमा झापाका उमेश चौंलागाईंलाई निर्वाचित गरेको छ ।
भेलाले केन्द्रीय सदस्य तथा इलाम इञ्चार्जमा कुमारी राई, केन्द्रीय सदस्य तथा इलाम सह इञ्चार्जमा शिला श्रेष्ठ, केन्द्रीय सदस्य तथा पाँचथर इञ्चार्जमा सुरेश साहलाई निर्वाचित गरेको छ ।
सो भेलाबाट निर्वाचित महासंघका केन्द्रीय सचिवालय सदस्य तथा प्रचार विभाग प्रमुख स्वयम्भुराज डंगोलका अनुसार पुनर्गठित १८४ सदस्यीय केन्द्रीय कमिटीको कार्यकाल ४ वर्षे अवधिको हुनेछ । भेलाले सातैवटा प्रदेशका लागि महासंघको प्रमुख, इञ्चार्ज र सह इञ्चार्ज तोकेको छ ।
त्यसअघि शुक्रबार महासंघले ‘खेलकुद क्षेत्रमा लगानी बढाऔं, असल खेल संस्कृतिको विकास गरौं’ भन्ने मूल उद्घोषका साथ विशेष राष्ट्रिय भेला सम्पन्न गरेको थियो ।
