अर्जुनधारा । मनास्लु एफसी कालिस्थानलाई रोक्दै झापा एफसी राजगढ यहाँ जारी झापा जिल्लास्तरीय फुटबल प्रतियोगिताको फाइनलमा प्रवेश गरेको छ ।

स्थानीय दीपज्योति खेलमैदानमा मंगलबार भएको अन्तिम सेमिफाइनलमा झापा एफसीले ४-२ गोलले पराजित गर्दै फाइनलमा प्रवेश गरेको हो ।

पहिलो हाफमै ४–० गोलले पछि परेको अवस्थालाई उल्टाउने प्रयास गर्दै मनास्लु एफसीले दोस्रो हाफमा २ गोल गरेको थियो । पहिलो हाफमै अग्रता लिएको झापा एफसीले भने दोस्रो हाफमा लय गुमाएको थियो ।

झापा एफसीका लागि विशाल दर्जीले खेलको ८औँ मिनेटमा गोल गरेर अग्रता दिलाएका थिए । त्यस्तै, खेलको १०औँ र २३औँ मिनेटमा रमन तामाङले व्यक्तिगत दोस्रो गोल गरे भने अन्तिम गोल गणेश हेमरमले खेलको ३१औँ मिनेटमा गरेका थिए ।

दोस्रो हाफमा उत्कृष्ट प्रदर्शन गरेको मनास्लुका समित गुरुङ दोस्रो हाफको ९ मिनेटमा गोल गरेर खेलमा फर्कने प्रयास गरे । त्यस्तै, शेरु लिम्बूले १८औँ मिनेटमा थप गोल गरे पनि जीतका लागि सम्भव भएन ।

खेलको म्यान अफ दी म्याच झापा एफसीका श्याम मुर्मू घोषित भए । उनलाई अर्जुनधारा १० नम्बर वडाका अध्यक्ष बलदेव गोम्देनले पुरस्कारस्वरुप नगद २ हजार प्रदान गरे ।

कप्तानबारी युवा क्लबले आयोजना गरेको प्रतियोगितामा जिल्लाका ८ टिम सहभागी थिए । झापा एफसी राजगढले बिहीबार अर्जुनधाराको शनिश्चरे एफसीसँग फाइनल खेल्नेछ ।

प्रतियोगिताको विजेताले नगद ३० हजार र उपविजेताले नगद २० हजारसहित ट्रफी पाउने आयोजक क्लबका अध्यक्ष श्याम दनुवारले जानकारी दिए ।