बिर्तामोड । नेपाल आइसले पाँचौ झापा गोल्डकप फुटबल प्रतियोगिताको लागि मुख्य प्रायोजन गर्ने भएको छ । प्रायोजन गर्नेबारे बिर्तामोडमा आयोजित कार्यक्रममा कम्पनीका प्रतिनिधि मनिष सिंह र गोल्डकप आयोजक समितिका अध्यक्ष विनोद बस्नेतले सम्झौता गरेका छन् ।
मोफसलकै प्रतिष्ठित र लोकप्रिय फुटबल प्रतियोगिता झापा गोल्डकपको पाँचौँ संस्करणका लागि गोल्डकपका अध्यक्ष विनोद बस्नेत र नेपाल आइसका मार्केटिङ मेनेजर मनिष सिंहले सम्झौता पत्रमा हस्ताक्षर गरेका हुन् । यस बर्ष पहिलो पटक झापा गोल्डकपमा नेपाल आइसको इन्ट्री भएको हो ।
गोल्डकपको पाँचौ संकरणलाई अझ उत्कृष्ट, भव्य र परिष्कृत बनाउन आफ्नो कम्पनीको उत्पादन नेपाल आइस बियरले गोल्डकप प्रायोजन गरेको सिंहले बताए।
झापाको भूगोल र फुटबलप्रतिको लगावलाई समेट्दै जिल्लालाई फुटबल हबको रुपमा विकास गर्ने उद्देश्यले काम गरिरहको झापा गोल्ड कपका अध्यक्ष विनोद बस्नेतले बताए । ‘विर्तामोडका व्यवसायीले खेलकूद क्षेत्रमा खासै चासो दिएका छैनन्’, बस्नेतले भने ‘ बिर्तामोडमा विभिन्न क्षेत्रबाट आएर व्यवसाय गरी लाखौं रुपैंयाँ कमाए पनि खेलकूदको क्षेत्रमा सहयोग सहयोग भएको छैन ।’ उनले खेलप्रति पनि सबै व्यवसायीलाई सहयोग गर्न आग्रह गरे ।
झापा गोल्डकप फागुन २१ देखि विर्तामोड स्थित डोमालाल राजवंशी रंगशालामा हुनेछ । विजेताले नगद १२ लाख ५५ हजार पाउनेछ ।
