झापा । झापाको झापा गाउँपालिका-४ मा रहेको डिल्लीराज माध्यमिक विद्यालयका प्रधानाध्यापक वीरेन्द्रप्रसाद गुप्तालाई विद्यालय प्रवेशमा रोक लगाइएको छ ।
नेपाल कम्युनिस्ट पार्टी (विप्लव समूह)ले बुधबार एक विज्ञप्ति जारी गर्दै प्रअ गुप्ताले गरेको अनियमितता छानबिन नगरेसम्म उनलाई विद्यालय प्रवेशमा रोक लगाइएको जनाएको छ ।
विप्लव समूहको झापा गाउँपालिका कमिटीले विद्यायलभित्र प्रअ गुप्ताले गरेका अनियमितताको छानबिन नगरेसम्म रोक लगाइएको इञ्चार्ज कुमार सीले जनाएका छन् । बुधबारै विप्लवका कार्यकर्ताहरूले प्रअ गुप्ताको कोठामा तालाबन्दीसमेत गरेका छन् ।
गुप्ताले विद्यालयमा अपारदर्शी ढंगले काम गरेपछि यतिबेला त्यहाँका शिक्षक, कर्मचारी, व्यवस्थापन समिति, अभिभावक, स्थानीयबासी सबै रुष्ट भएका छन् । पटक-पटक प्रअ गुप्तामाथि भ्रष्टाचार आरोप लाग्दा पनि गाउँपालिकाले छानबिन नगरेपछि विप्लव समूहले एक्सन लिएको जनाएको छ ।
उनीविरुद्ध अख्तियार दुरुपयोग अनुसन्धानको कार्यालयमा उजुरीसमेत परेको छ । स्थानीय राजनीतिक दल, बुद्धिजीवी, जग्गादाताहरूले विद्यालयको पारदर्शीता खोजेका छन् । तर, प्रअ गुप्ताले उनीहरुको मागलाई बेवास्ता गर्दै आएका छन् । विद्यालयको भौतिक संरचना,दिवा खाजालगायतमा ठूलो अनियमितता गरेको गुप्तामाथि आरोप छ ।
यसअघि अर्जुनधारा नगरपालिकाको लक्ष्मी माविमा प्रअ हुँदा पनि विद्यालय भवन निर्माणमा अनियमितता भएको आरोप लागेपछि उनी सरुवा लिएर गएका थिए ।
